ഹരി ഓം, നമ: ശിവായ

സനാതന ധർമ്മം എന്നത് കേവലം ഒരു മതപരമായ ആചാരമല്ല, മറിച്ച് പ്രപഞ്ചത്തിലെ സർവ്വ ചരാചരങ്ങളിലും കുടികൊള്ളുന്ന ഏകമായ ചൈതന്യത്തെ തിരിച്ചറിയുന്ന പരമമായ സത്യമാണ്. ഈ സത്യം സ്വന്തം ജീവിതത്തിൽ പകർത്തുക എന്നത് വലിയൊരു തപസ്യയാണ്.

ആ ചൈതന്യത്തെ ഉൾക്കൊള്ളുന്നവർക്ക് പ്രപഞ്ചത്തിലെ മറ്റൊരു ജീവിയെയും കേവലം ആഹാരമായോ ഉപഭോഗവസ്തുവായോ കാണാൻ സാധിക്കില്ല. സനാതന ധർമ്മം വിഭാവനം ചെയ്യുന്ന ഈ അഹിംസാധിഷ്ഠിതമായ മൂല്യബോധം മറ്റുള്ളവയെ ആഹാരമാക്കുന്നതിനെ സ്വാഭാവികമായി കാണുന്ന മറ്റു മതങ്ങളുടെ  വിശ്വാസപ്രമാണങ്ങളിൽ നിന്നും, സനാതന ധർമ്മത്തെ വേറിട്ടു നിർത്തുന്നു.

“എല്ലാ ജീവജാലങ്ങളിലും ഒരേ ഈശ്വരചൈതന്യം കുടികൊള്ളുന്നു എന്ന തിരിച്ചറിവാണ് ഭാരതീയ ചിന്തയുടെ കാതൽ. ഈ അദ്വൈത ദർശനം ഹൃദയത്തിൽ സ്വീകരിച്ച ഒരാൾക്ക് മറ്റൊരു ജീവനെ വേദനിപ്പിക്കാനോ ഹനിക്കാനോ സാധിക്കില്ല”.

സനാതന ധർമ്മം അനുശാസിക്കുന്ന ജീവിതശൈലി പാലിച്ച് ജീവിക്കാൻ ഹൈന്ദവ വിശ്വാസികൾക്ക് സാധിക്കുന്നത് ഈ ഒരു മൂല്യബോധം അവരുടെ സംസ്കാരത്തിൽ അലിഞ്ഞുചേർന്നതുകൊണ്ടാണ്.

പ്രപഞ്ചത്തിലെ ഏകമായ ചൈതന്യത്തെ തിരിച്ചറിയാത്തവർക്കോ, മറ്റു ജീവനുകളെ ആഹാരമാക്കുന്നതിൽ തെറ്റില്ല എന്ന് വിശ്വസിക്കുന്നവർക്കോ ഈ ഉന്നതമായ ആത്മീയതയുടെ ആഴം ഉൾക്കൊള്ളാനാവില്ല. സനാതന മൂല്യങ്ങളുടെ പൂർണ്ണത വെളിപ്പെടുന്നത് അപരനോടുള്ള കാരുണ്യത്തിലും എല്ലാ ജീവനുകളിലുമുള്ള തുല്യമായ ചൈതന്യത്തെ വന്ദിക്കുന്നതിലുമാണ്.

ഈ ചിന്താധാരയുടെ പശ്ചാത്തലത്തിലാണ് ആത്മവിദ്യ എന്ന മഹത്തായ അറിവ് ഹൈന്ദവ വിശ്വാസികളിലേക്ക് ആഴത്തിൽ ഇറങ്ങിച്ചെല്ലുന്നത്. ആത്മവിദ്യയുടെ ലക്ഷ്യം വ്യക്തിയെ സ്വയം തിരിച്ചറിയാൻ പ്രാപ്തനാക്കുക എന്നതുമാത്രമല്ല, മറിച്ച് ആ തിരിച്ചറിവിലൂടെ സമൂഹത്തിൽ വലിയ പരിവർത്തനങ്ങൾ സൃഷ്ടിക്കുക എന്നതുകൂടിയാണ്. തന്നിലുള്ള ചൈതന്യം തന്നെയാണ് അന്യനിലും എന്ന് ബോധ്യപ്പെടുന്നതോടെ സ്വാർത്ഥത ഇല്ലാതാകുകയും സ്നേഹവും കരുണയും ജീവിതപ്രമാണമായി മാറുകയും ചെയ്യുന്നു.

വ്യക്തികളിൽ ഉണ്ടാകുന്ന ഈ മാറ്റം സമൂഹത്തിന്റെ ഉന്നമനത്തിന് അത്യന്താപേക്ഷിതമാണ്. ലോകനന്മയ്ക്കായി സ്വയം അർപ്പിക്കാൻ തയ്യാറുള്ള ഒരു തലമുറയെ വാർത്തെടുക്കാൻ ആത്മവിദ്യയിലൂടെ സാധിക്കും എന്നത് നിസ്തർക്കമാണ്.

സനാതന ധർമ്മം വിഭാവനം ചെയ്യുന്ന വിശ്വമാനവികതയിലേക്ക് ഓരോ വിശ്വാസിയെയും നയിക്കുന്ന ഈ പ്രയാണം നന്മയുടെയും ശാന്തിയുടെയും പുതിയൊരു കാലത്തിന് വഴിതുറക്കും.

സ്വാമി ഹരിദത്തൻ 

ഹരി ഓം, നമ: ശിവായ

विजयी भवतु, सुखिनो भवतु।

ആത്മ വിദ്യാ പീഠം